• Retropop 2015

    het weer dat was nou niet echt top
    toch waren alle kaorten verkocht
    aspirant bejaorden bint verknocht
    an artiesten van toen, bij Retropop

    het was dit jaor een dolle boel
    met Rob de Nijs, de “Time Bandits”
    “Clousseau”, “van dik hout” en “The Nits”
    ok Henk en Henk van “Het goede doel”

    as hoogtepunt iets ongewoons
    hij zung al in de tieden van hippies
    kreeg toen hiel vaak wichter-slippies
    dat zat wal snor met “Sir” Tom Jones

    Tom hef zuchzölf weer overstegen
    zien stem die is nog goed van klank
    en van ’t publiek, as bliek van dank
    verscheidende “Tena Lady’s” kregen

     

    retropop

     

    S. Karremans                                                         juni 2015

  • Eerste artikel

    1 september.

    Vanof vandage bin ik officieel de neie taolschulte van de gemiente Emmen.
    Daor bin ik barre wies met en gao mij der goed veur inzetten.

    Ik bin op zuuk naor keurnoten die mij wilt helpen.

    Iets veur je? IJ kunt op dizze webstee gewoon een berichtie achterlaoten.

  • Pluk de dag

    het leven is kört zo wordt er zegd
    en die ’t zegt die hebt geliek
    kört leden nog een jonge god
    maor as ik ’s mörgens in spiegel kiek

    zie ik een man met rimpels
    wat voller in ’t gezicht
    ik kom er niet meer underoet
    te kört veur mien gewicht

    ik doe nog wat ik doen wil
    heb ’n vrouw die um mij gef
    maor as ik ’s mörgens in spiegel kiek
    krieg ik opiens ’t besef

    a’k dommies  in ’t bejaordenhoes
    vertellen wil van toen
    zeg evenbeeld in spiegel
    moej nou wal mooie dingen doen

     

    S. Karremans                                                 juli 2014

  • Ode an de vrouw

    God dacht
    nao ’t scheppen van hemel en aarde
    dat was mij toch een hels karwei
    deed er op de zesde dag
    een mannelijk mèens as schepsel bij

    daornao kwam Eva,
    die hij veur het lest bewaarde
    vrouwelijk, nakend,
    zeker niet pervers

    God dacht eigenlijk hiel gewoon
    elke taort verdient een kers

     

    S. Karremans                                                 april 2015

  • Depressie

    Regen, regen en nog ies regen.
    Het regent al dagen aan ien stuk.
    Mien vrouw is hielemaol van slag.
    Mistroostig  tuurt ze deur het raom.
    As het zo wieder giet, moe ‘k heur,
    toch maor ies binnenlaoten.

     

    S. Karremans                                                december 2013

  • Dikke Arms, kleine bienties

    Een verhaaltie oet mien boek.

    Wark en ongelukkig wezen

    Alles gung zien gang, het sporten gung beter en beter, en de schoel wuur minder en minder. Um eerlijk te wezen heb ik de mavo met pien en muite haald. En op die mavo was een decaan. Die man had echt het beste met mij veur, daor wil ik gien kwaod woord over heuren. Hij had zuch ok echt verdiept in mien situaotie.

    ‘Moej goed luustern, mien jong. As jij later wark hebben wilt zuj toch wat beter je best moeten doen op schoel. Ik bin gisteraovend even bij je volk west um te praoten en die waren het ok hielemaol met mij iens.’

    ‘Kiek,’ zee hij, ‘in je geval kuj niet veul aans as een kantoorbaantie doen. Jij kunt ja niet achter op de eerappelrooier staon of op een steiger as metselaar, toch?’
    ‘Nee,’ zee ik, ‘daor hej dan ok wal weer geliek an, maor ik heb mien zinnen zet op een glansrijke carrière as topsporter in mien racekarre.’
    ‘Ja, ja,’ lachte hij, ‘maor dat holdt ok een keer op aj wat older wordt, mien jong, en dan smaakt je de neie eerappels ok nog wal. Die zul je dan toch mötten kopen. Daorum,’ vervolgde hij, ‘hebben je olders en ik besleuten dat jij naor de meao gaot, en wel wet, aj goed je best doet, kuj wal boekholder worden of op een bank warken.’